Siglir tar il cuntegn

Header

cuntegn

Mancanza d'emprimas abitaziuns Segl ha preschentà in puschel mesiras pussaivlas

audio
Strategias per schliar il problem cun las segundas abitaziuns
ord Actualitad dals 26.03.2022.
laschar ir. Durada: 3 minutas 27 Secundas.

Basa per las discussiuns ils proxims mais a Segl pervi da la mancanza d'emprimas abitaziuns – èn mesiras a curta, media e lunga vista. Mesiras che pertutgan la construcziun da novas abitaziuns, la vendita d'abitaziuns existentas e midadas en la lescha communala d'abitaziuns secundaras. Il venderdi saira è la populaziun da Segl vegnida infurmada, suenter che la vischnanca aveva mess en vigur ina zona da planisaziun il schaner. Previsas èn damai:

  • Mesiras a lunga vista: augmentar la cifra d'utilisaziun e sistems da boni
  • Mesiras a media vista: la construcziun da novas emprimas abitaziuns
  • Mesiras a curta vista: limitaziuns dal diever

Mesiras a curta vista

Tenor la presidenta communala Barbara Aeschbacher èn las mesiras a curta vista entant quellas ch'èn definidas il pli en detagl. Uschia èsi previs d'introducir ina quota d'emprimas abitaziuns da per exempel 50% tar projects da contrucziun pli gronds:

  • Sch'ina chasa vegn sbuvada e construida da nov.
  • Sch'ina chasa vegn renovada substanzialmain, per exempel sche l'intern vegn disfatg.
  • Sch'i dat midaments pli gronds a l'intern, per exempel ina nova cifra d'abitaziuns en chasa.

Ina quota d'emprimas abitaziuns duai dentant era vegnir introducida tar la vendita da chasas ed abitaziuns:

  • Tar in midament d'emprimas abitaziuns en abitaziuns secundaras.
  • Sch'ina abitaziun secundara duai restar era en avegnir ina abitaziun secundara.

Tar la vendita datti dentant la pussaivladad d'ina taxa da cumpensaziun – en cas ch'ina intervenziun da construcziun fiss memia gronda u sch'i vegn cumprà mo in'abitaziun e betg in'entira chasa.

Stritgar in artitgel giuven or da la lescha

Sco terza mesira a curta vista propona la suprastanza communala da Segl da stritgar ord la lescha communala d'abitaziuns secundaras la pussaivladad – da midar in'emprima abitaziun suenter 20 onns en in'abitaziun secundara. Questa pussaivladad han ils da Segl dapi l'onn 2018. Uss duai ella puspè vegnir stritgada.

Per Barbara Aeschbacher èsi cler, che questa proposta vegn ad esser quella che vegn a procurar per las pli grondas discussiuns, ensemen cun l'introducziun d'ina quota d'emprimas abitaziuns suenter ina vendita.

Ils 23 da zercladur ha lieu ina saira da discussiun nua che la populaziun po discutar las propostas ed era inoltrar ulteriuras. Per Barbara Aeschbacher èsi impurtant da lavurar vi da quest project ensemen cun la populaziun e betg davos portas serradas.

RTR actualitad 07:00

Artitgels legids il pli savens

Scrollar a sanestra Scrollar a dretga