Las speculaziuns han ina fin: En la Val Roseg n'èsi planisà nagin'ovra idraulica. La vischnanca da Samedan communitgescha ch'ins haja survegnì la conferma dal Deparlament federal d'energia UVEK.
La regiun «Lej da Vadret» na figureschia betg sin la glista dals projects ch'èn vegnids discutads en il rom dad ina maisa radunda da la Confederaziun. Sin basa d'ina glista da 33 propostas aveva quella proponì 15 projects che duain vegnir persequitads vinavant per construir ovras idraulicas.
La vischnanca da Samedan saja vegnida activa suenter ch'ins saja vegnì contactà d'organisaziuns da l'ambient cun l'infurmaziun che la regiun «Lej Vadret» figureschia sin ina glista da reserva. Cun contactar l'UVEK hajan ins ussa vulì stgaffir ils fatgs. La Confederaziun haja plinavant confermà ch'i na saja er betg enconuschent che concerns d'energia hajan plans correspundents en la val Roseg.
