Hotels e restaurants stattan avant la stagiun da stad. Ma divers èn anc adina en tschertga da persunal adattà. Per surmuntar la situaziun actuala ston singuls hotels avrir damain dis il restaurant u diminuir il spazi da service cun allontanar maisas. En singuls hotels sto il schef sez puspè prender la padella enta maun.
Pliras raschuns pussaivlas
La raschun per questa situaziun è tenor divers gastronoms en l'Engiadina Bassa la situaziun da la pandemia da corona. Blers eran vegnids malsegirs dad avair era en l'avegnir ina plazza ed han bandunà la regiun. Singuls han midà lur job. In’autra raschun è era il fatg che bleras e blers na vulan betg lavurar la saira u la fin d’emna.
La situaziun e dentant fitg tendida en l'Engiadina Bassa. Ma la stagiun da stad è avant porta e plirs hotels e restaurants èn sfurzads da trair mesiras e reducir la purschida per surmuntar il manco en il persunal.
Suenter bun enviern suonda stad difficila
Ils resultats d'ina retschertga da da l'uniun da branscha HotellerieSuisse dal Grischun tar las secziuns mussa ch'ins quinta ch'ils problems da recrutar cuntinueschan. En media vegn quintà cun ina mancanza da 10% tar il persunal dal fatg, e da 6,7% tar il persunal auxiliar. Era il stan actual da las cudeschaziuns per la stad è sut quel da l'onn passà. Da l'autra vart para la stagiun d'enviern passada d'esser stada megliera che la precedenta (media da +15%).