Quai per pudair dir: tut ils sforz logistics e finanzials enturn l'eveniment sa rendan. In preventiv da radund 90'000 francs, stuair serrar la via chantunala da Malögia a S-chanf, in aut livel da segirezza - tut quai dovra sia legitimaziun di Annett Fankhauser, cunorganisatura da l'eveniment. Avant 2 onns han ses um ed ella puspè clamà en vita il maraton suenter che quest era svanì da l'agenda per 6 onns.
Tschertgar sinergias per dar in futur al maraton d'inline
Suenter l'occurrenza da l'onn passà han ils organisaturs fatg ina retschertga tar ils participants. Ils feedbacks eran fitg positivs di Annett Fankhauser, perquai sajan els in zic dischillus che il numer da participants è betg creschì quest onn.
I po dentant esser che blers s'annunzian pir sin basa da la davosa prevista d'aura.
Per garantir era en avegnir l'eveniment vulan ils organisaturs stgaffir sinergias en la regiun. Partir ils custs e las incumbensas faschess senn di Annett Fankhauser.
Els han en mira da contactar ils organisaturs dal maraton da skis engiadinais. Quest tschertgan enconuschentamain la collavuraziun cun auters eveniments da sport.