La conferenza dals presidents dals clubs da skis e dals commembers da la cumissiun dal Maraton da skis engiadinais ha presentà la nova supratsanza da l'uniun dal maraton: Andi Grünenfelder, Hansjörg Trachsel, Vic Jacob, Urs Pfister e Beat Gruber furman la nova suprastanza che surpiglia il timun suenter l'ediziun 2016 dal maraton.
Nums prominents
Cun l'anteriur passlunghist e victur dad ina medaglia olimpica Andi Grünenfelder, cun l'anteriur cusseglier guvernativ Hansjörg Trachsel e cun l'anteriur directur dal hotel Suvretta House Vic Jacob è la nova suprastanza occupada cun nums prominents. Urs Pfister è impressari da Samedan e Beat Gruber, il chanzlist da Schlarigna, represchenta ils clubs da skis en la suprastanza nova. Formalmain sto l'uniun dal Maraton da skis engiadinais anc confermar l'elecziun da la nova suprastanza; quai en avrigl 2016 a la radunanza generala extraordinaria.
Sco proxim ston ins anc eleger in nov mainagestiun che stat lura operativamain a la testa dal Maraton da skis engiadinais.