Per la cursa da dunnas che parta a Samedan ed arriva a S-chanf è tut pront, tenor il directur dal Maraton da skis engiadinais, Menduri Kasper. La 22avla ediziun ha lieu sin il traject original. Pitschnas difficultads dettia unic curt suenter la partenza en il territori Promulins. Là vegn la loipa numnadamain ad esser in pau pli stretga sco ils auters onns. Il rest dal traject saja segirada grazia a la naiv artifiziala ch’ins haja fatg durant l’enviern.
Anteriura biatleta tutga tar favuritas
Var 900 participantas èn annunziadas per la cursa da dunnas. Entant che bleras dad ellas fan la cursa per il plaschair, attira la cursa er mintg’onn atletas professiunalas. Tar las favuritas tutga quest onn l’anteriura biatleta engiadinaisa, Selina Gasparin. Ella aveva gudagnà la cursa da dunnas l’onn 2014, uschè Menduri Kasper. Cun il culp da partenza da la 22avla cursa da dunnas vegn lantschada l’emna da maraton en Engiadin’Ota.