Siglir tar il cuntegn

Header

audio
Ils embrugls al Maraton da skis engiadinais
Or da Actualitad dals 24.03.2023. Maletg: RTR
laschar ir. Durada: 3 minutas 30 Secundas.
cuntegn

Maraton da skis engiadinais Intginas participantas e participants han embruglià

Ch’il 53avel Maraton da skis engiadinais ha pudì avair lieu, è be stà pussaivel cun in grondischem sforz dals organisaturs. Causa la mancanza da naiv eran els numnadamain sfurzads da chattar soluziuns e d’adattar il traject. Uschia ha stuì vegnir drizzà en in sviament per la part tras il guaud da Staz.

Tratg or ils skis

Quel ha manà da San Murezzan Bogn sur il lai si vers la Meierei. En tscherts lieus era la loipa stretga e quai ha chaschunà colonnas il di da la cursa.

Nus savevan ch’i pudess dar ina colonna pli lunga tar la Meierei e che las participantas ed ils participants dovran dapli pazienza ch'usità.
Autur: Menduri Kasper directur maraton da skis engiadinais

A San Murezzan Bagn percunter n’hajan ins betg fatg quint cun ina colonna. Perquai n’hajan ins, auter sco tar ils lieus enconuschents, betg partì en in voluntari che fa controlla che tuts sa tegnan vid las reglas. Intginas passlunghistas e passlunghists hajan nizzegià la situaziun e tratg or ils skis per surpassar la colonna.

Jau n’hai nagin’encletga per quest embrugl! Perquai avain nus decis consequenzas per che quellas persunas n’han nagin avantatg.
Autur: Menduri Kasper directur maraton da skis engiadinais

Temp da qualificaziun vegn adattà

Per che las embrugliadras ed ils embrugliaders n’hajan nagin avantatg per la qualificaziun dal bloc da partenza per l’onn proxim, hajan ins decis da stritgar il temp intermediar tranter Silvaplauna e Puntraschigna.

RTR actualitad 17:00

Artitgels legids il pli savens