Siglir tar il cuntegn

Header

Purtret da passlunghists.
Legenda: Per il Maraton da skis engiadinais na datti naginas plazzas da partenza pli. Keystone
cuntegn

Maraton da skis engiadinais Plazzas da partenza per il maraton èn vendidas or

Tuttas 14'200 plazzas da partenza per il 52avel Maraton da skis engiadinais èn occupadas. Quai è gia la terza giada en roda ch'ils bigliets èn davent anticipadamain, e quai uschè baud sco anc mai. Plazzas libras datti dentant anc per la cursa da dunnas e per la cursa da notg.

Gia avant che la cursa ha insumma lieu, han ils participants e las participantas dal Maraton da skis engiadinais rut in record. Anc mai è l'eveniment stà vendì or uschè svelt sco quest onn. La cursa da Malögia a S-chanf è il pli grond maraton da passlung en Svizra.

Tar la cursa da dunnas guarda quai anc or in zic meglier, ma er qua sajan ins sin buna via da vender ora anticipadamain las plazzas da partenza. La cursa da dunnas va sur 17 kilometers da Samedan a S-chanf ed ha mintgamai lieu in'emna avant il maraton.

La cursa da notg sur 17 kilometers durant l'emna dal maraton saja er s'etablida, scrivan ils organisaturs. Il traject maina da Segl sur ils lais da l'Engiadina a San Murezzan e tras il guaud da Staz fin a Puntraschigna. Er per questa cursa hai anc plazzas da partenza.

RTR novitads 18:00