Siglir tar il cuntegn

Engiadina Maraton da skis engiadinais – Tge far cun la fotografia?

Al maraton da skis engiadinais èn fotografs da la firma Alphafoto scumpartids a differents lieus dasper las loipas. Ils fotografs emprovan da far da mintga curridur almain ina fotografia. Dentant tge pon ins far cun la fotografia tramessa a chasa, sch'ins na vul betg salvar ella.

passlunghists cun giacca verda, cotschna e blaua.
Legenda: Ils fotografs al maraton emprovan da far da mintga curridur almain ina fotografia. Beat Andriuet

Las fotografias fatgas dals fotografs survegn ins per il pli 3 fin 4 emnas suenter il maraton cun la posta a chasa – senza ch’ins ha empustà ellas. Era online sa chattan las fotografias gia in di suenter il maraton.

I dat quatter differentas opziun tge far cun quella fotografia ch’ins survegn: Ins po tegnair la fotografia e pajar ella, ins po tegnair la fotografia senza pajar ella, ins po trametter enavos la fotografia ni era bittar davent ella.

Tut las opziuns èn pussiblas. Sch’ins na vul betg survegnir ina fotografia ston ins prender si contact cun la firma Alphafoto. Quai pon ins far sin lur pagina d’internet, per mail u per telefon.