Pervia da la pandemia da corona han ils organisaturs da la cursa da velo, l’Engadin Radmarathon, decis gia baud da restar cun il traject en Svizra. La cursa roiala che manava da Zernez sin il pass dal Fuorn fin a Livigno ed enavos sur il pass dal Bernina scroda.
Traject «La Svizra» sur 119 kilometers
Empè dals 214 kilometers usitads va la cursa quest onn mo sur 119 kilometers. La cursa maina da Zernez sur il pass dal Flüela fin a Tavau e suenter vinavant sur il pass da l’Alvra fin a l’arrivada a Zernez.
Per ils profis èsi forsa in pau massa pac – per ils pli debels massa bler. Per la gronda part tranteren è il traject ideal.
Sper la cursa principala datti quest onn in prolog, quai en furma d’ina cursa cunter l’ura. Cun partenza a Zernez maina questa traject sur var set kilometers sin il pass dal Fuorn fin Ova Spin.
Corona mida pia er il program dal 15avel Engadin Radmarathon. Tuttina è Fabian Schorta cuntent dad insumma pudair organisar l’occurrenza.