Ils 20 da zercladur fiss atgnamain lur grond di. Pervia dal coronavirus ston Marc Wolf e Selina Grass dentant probablamain spustar lur nozza. Per il mument prendan els en egl ina data l'avust. La speranza ch'i pudess tuttina gia funcziunar quest zercladur na saja dentant anc betg dal tut davent. Però:
Ins sto esser realistic e vesair, tge ch'è pli impurtant. La nozza pon ins er far l'onn che vegn [...].
Il punct che disturba tuttina: Il pèrin, surtut la spusa Selina Grass, haja investì bler temp en la planisaziun. Il plaschair anticipà saja stà fitg grond.
Parents en Svezia
Che lur nozza era planisada ils 20 da zercladur n'è nagina casualitad. En emprima lingia saja la data dals 20.06.2020 «ina bella data», plinavant saja lura en Svezia la festa da mesastad (Mittsommerfest). Durant quest temp hajan ils parents ed amis ch'il spus ha en Svezia segir liber, ed uschia hajan quels er temp da vegnir a sia nozza.
Fin ils 15 da zercladur na possian quels insumma betg vegnir en Svizra. Vinavant, cun spustar la nozza, saja il chattar in termin difficil per ils amis e parents. Marc Wolf para dentant tuttina da vesair quai relativamain luc.
Ins po betg ballar sin mintga nozza. Perquai pens jau, cler, ch'igl è donn. Dentant nus vulain tuttina far ina bella festa.
Puncts positivs n'haja la spustada da la nozza bunamain nagins. Mo in: ina buna collega da Selina Grass na pudeva betg vegnir a la nozza ils 20 da zercladur. Sch'ella vegn spustada sin la fin d'avust pudessia quai dentant tuttina gartegiar.