Il cusseglier guvernativ Martin Jäger na va betg d'accord cun la critica da l'Institut Otalpin a Ftan (IOF). L'IOF vaiva crititgà ch'il chantun disavantagieschia la scola media da l'Engiadina Bassa. L'institut haja dumandà ina promoziun d'economia da 300'000 francs. Il chantun haja refusà la dumonda. Quai saja era gist uschia, argumentescha Martin Jäger. Ins na possia betg sustegnair ina da las scolas medias privatas cun raps dal chantun. Quai fiss malgist envers tut tschellas scolas medias. Jon Peer, il president dal cussegl administrativa da l'IOF, na va era betg d'accord cun questa replica dal chantun. Mintga scola media privata saja unica. Uschia na sa possia ins betg congualar las scolas e dir ch'ins possia be sustegnair nagina u tuttas ensemen.
10avel onn da scola: inoltrà dumonda u betg?
Era tar la dumonda da sustegn per il 10avel onn da scola a Ftan divergeschan ils puncts da vista: Il cusseglier guvernativ Martin Jäger di che ina tala dumonda na saja betg arrivada da Ftan. Jon Peer di ch'ins haja inoltrà la dumonda, il chantun haja dentant pretendì anc ulteriurs documents. L'IOF saja londervi dad inoltrar quels. Il chantun haja dentant gia tramess signals negativs: Ch'i na saja betg necessari dad offrir in 10avel onn da scola a Ftan. I saja avunda schi dettia quella offerta a l'Academia Engiadina a Samedan. Quai ha ditg Peer envers RTR. Per el èsi dentant cler ch'i na possia betg esser che ils scolars da l'Engiadina Bassa stoppian ir fin a Samedan per in 10avel onn da scola.
L'IOF vul ussa cumbatter vinavant per survegnir sustegn dal chantun. Martin Jäger percunter ha ditg ad RTR che a lunga vista saja quai cler, ch'i na possia betg pli dar tut las scolas medias en il chantun. En il Grischun dettia quai simplamain adina damain uffants.