Siglir tar il cuntegn

Engiadina Massa pitschen per esser grond – massa grond per esser pitschen

La Bieraria Tschlin SA funcziuna bain, malgrà la gronda concurrenza sin il martgà da biera en Svizra. Rumpatesta fan sulettamain las finanzas, perquai dovri uss ina nova strategia – daventar pli grond.

La chasa da la bieraria engiadinaisa a Martina (Valsot).
Legenda: La chasa da la bieraria engiadinaisa a Martina (Valsot). RTR, Dario Müller

Dacurt è cumparì il rapport annual 2017 da la Bieraria Tschlin SA. La bieraria engiadinaisa funcziuna bain ed ha in bun num sin il martgà svizzer, di il president dal cussegl d'administraziun Andrea Gilli.

Rumpatesta fan las finanzas

La Bieraria Tschlin SA scriva in deficit da radund 65’000 francs. Per agiunscher megliers resultads sto il cussegl d'administraziun sviluppar ina nova strategia. La finamira fiss, d’augmentar la producziun da biera da radund 1’500 sin 5’000 – 7’000 hectoliters ad onn. Quai ha lura per consequenza che la logistica sco era la distribuziun ston vegnir reorganisadas. Areguard la logistica èsi previs da chattar ina soluziun a Valsot. E per organisar meglier la distribuziun prevesa il cussegl d'administraziun da tschertgar in partenari.

In partenari sto viver nossa filosofia
Autur: Andrea GilliPresident dal cussegl d'administraziun

Il partenari stuess esser d’accord cun il lieu da producziun che sa chatta a Martina ed era s’identifitgar cumplettamain cun la producziun da biera biologica.

Ils resultats vegnan preschentads a la radunanza generala 2019.

RR actualitad 08:00