Siglir tar il cuntegn

Header

video
Mathias Bulfoni e ses engaschi per l'hotellaria indigena
Or da Telesguard dals 25.10.2018.
laschar ir. Durada: 3 minutas 8 Secundas.
cuntegn

Engiadina Mathias Bulfoni – il manager dals pitschens

Gronds projects n'interessan betg Mathias Bulfoni. El s’engascha per projects da l’hotellaria e quai surtut là, nua che el vesa persunas che mussan engaschi.

Mathias Bulfoni ha vivì per il sport. Sco giuven magister da skis a San Murezzan ha el cumenzà sia carriera en il mund dal sport. Cuntinuà ha el sco schef da material da l'enconuschenta skiunza svizra, Marie-Therese Nadig, e dal Bulgarais Peter Popangelov. Pli tard è el stà engaschà per la marca da skis Spalding e sco importader general da la marca Adidas en Bulgaria.

Oz è Mathias Bulfoni oravant tut enconuschent sco fundatur da la Clinica Holistica a Susch. En il fratemp ha el vendì la clinica, ma è restà enavant president dal cussegl d'administraziun.

A l’Engiadina Bassa è el restà fidaivel

Ils affars e la gronda part da sia vita ha Mathias Bulfoni fatg en Bulgaria. Il motiv ch'el è turnà en Engiadina, è stada sia figlia che participava cun success a cursas da skis.

Sia experientscha ed il curaschi sco interprendider vul el uss, sco um da 67 onns dar vinavant a giuvnas e giuvens hoteliers. Cun sias relaziuns, ma franc er cun sias pussaivladads finanzialas, ha Mathias Bulfoni las meglras premissas per iniziar novs projects en il sectur da l’hotellaria.

Dacurt è el sa participà a la cumpra da l'hotel Buin a Guarda ed ha in sez en il cussegl d'administraziun da la Meisser Hotels SA. Avant onns ha el er dà agid a l'hotel Helvetia a Müstair.

Ses engaschament n’è però betg a fin: En l'hotel Süsom Give, sin il Pass dal Fuorn, vesa el il potenzial sco center da sportists che vulan trenar en l’autezza.

audio
Mathias Bulfoni – il manager dals pitschens
ord Actualitad dals 25.10.2018. Maletg: RTR, Georg Luzzi
laschar ir. Durada: 2 minutas 58 Secundas.

RR actualitad 17:00

Artitgels legids il pli savens