Siglir tar il cuntegn
cuntegn

Engiadina Mia Val – Duri Fasser expona en la Chasa Jaura

Duri Fasser è enconuschent sco pictur ed artist. Scho ch'ins po admirar en la Chasa Jaura ha el in dun spezial per documentar dissegnond il passà.

Legenda: Guardar il video Duri Fasser expona ses dissegns da la Val Müstair. Durada 03:08 minutas.
Or da Telesguard dals 12.10.2018.

«Mia Val» sa numna l’exposiziun actuala en la Chasa Jaura. La Val da Duri Fasser è manegiada cun quai. Cun plirs dissegns da rispli, però era cun picturas en colurs d’acril mussa el sia val Müstair.

Dissegns documentars

Cun stritgs fitg fins, subtils e precis ha el documentà bleras chasas ch’ins na chatta betg pli, ch'èn svanidas u èn vegnidas fabritgadas enturn. Duri Fasser vesa en ses dissegns ina valur documentara. Sia lavur na saja dentant betg ina lavur scientifica mabain artistica. Ses dissegns hajan cunzunt ina valur per ils possessurs da chasas ch’èn vegnidas fabritgada enturn ils ultims onns.

Sia vita – sia Val

Duri Fasser è naschì l’onn 1947. El è creschì si a Müstair ed ha fatg il giarsunadi sco pictur en Val. Suenter il giarsunadi ha el bandunà la Val ed è ì a Turitg en la scola d’art. In da ses idols e menturs era il renumà artist da frescos dal Tirol dal Sid, Karl Plattner. Duri Fasser ha bainprest badà ch'i n'è betg simpel da viver be da l’art. El turna en Val ed avra in affar da pictur a Müstair. Blers onns lavura el era en la claustra ed ha uschia invista en la lavur da restauraziun.

Gia il 1975 ha el pudì exponer per l'emprima giada en la Chasa Jaura, il 1993 la segunda giada ed ussa puspè.

RR actualitad 11:00