L'enviern passà saja stà in per emblidar ha ditg Vito Stupan, il president dal cussegl d'administraziun dals Implants da sport Val Müstair, che gestiuneschan il territori da skis Minschuns, durant la radunanza generala.
Senza naiv enfin la fin da schaner hai dà in minus da la svieuta da radund 25% u da 140'000 francs. Be perquai ch'ins haja gì er damain expensas da gestiun, resultia a la fin ina perdita mudesta da radund 17'000 francs per l'onn da gestiun 2016.
Optimissem grazia investiziuns
Malgrà l'enviern passà difficil regna dentant optimissem tar ils Implants da sport Val Müstair. Quai pervia che la radunanza communala ha decidì l'entschatta da november cleramain a favur dad investiziuns da 4,5 milliuns francs per Minschuns.
Ils Implants da sport èn uss vid concretisar il project dad ina pendiculara da Tschierv si Minschuns e dad indrizs da far naiv. Perquai sto la societad d'aczias dentant era anc augmentar il chapital d'aczias per radund in milliun francs. Sche quai reussescha n'ha il president dal cussegl d'administraziun Vito Stupan betg pudì confermar. Ins saja sin buna via ha el ditg envers Radiotelevisiun Svizra Rumantscha RTR.
Confermà il cussegl d'administraziun
La radunanza generala dals Implants da sport Val Müstair ha reelegì il cussegl administrativ cun il president Vito Stupan ed ils commembers Silvio Gruber, Hans Rupp, Marcus Cola, Jon Domenig, Lorenz Fallet, Mario Gross-Bass ed Aldo Rodigari. En pli è vegnì engrondì il cussegl administrativ e la radunanza ha elegì a Marcus Frey da Malans sco nov cusseglier administrativ. Il manader da gestiun da Minschuns, Daniel Pitsch, è vegnì onurà per ses 20avel giubileum sco manader da gestiun.
RR actualitad
