La construcziun d’in nov indriz d’ennavar en Val Müstair per la pista che maina dal territori da skis Minschuns giu la val è in pass enavant: La regenza ha approvà la revisiun parziala da la planisaziun locala che la vischnanca da Val Müstair aveva concludì l’onn passà.
Cun quai «stgaffeschia la regenza la basa da planisaziun» per l'indriz d'ennavar, scriva la Regenza grischuna en ina communicaziun.
Il tschancun maina sur 3,5 kilometers da la staziun da muntogna Alp da Munt fin giu il vitg Tschierv (Prà Chalchera) ed è il davos tschancun da pista. La surfatscha che duai vegnir ennavada cumpiglia 6,9 hectaras. Quai duai tenor la regenza meglierar la pista ed engrondir la segirtad da naiv da la pista ch'è savens serrada pervi da mancanza da naiv.
Quest enviern hai dà problems cun la naiv
Il territori da skis Minschuns ha stuì serrar quest enviern pervia da mancanza da naiv e dar en lavur curta. Ils 8 fin ils 14 da schaner èn ils runals stads airi. Tuttina avevan ils responsabels ditg envers RTR che la stgaudada dal clima na saja betg in privel per l'avegnir. I dependia bler dal project da bajegiar la nova pendiculara ch'aveva survegnì resistenza d'organisaziuns d'ambient.