Gista duas giadas en fila è Ladina Camenisch stada staziunada a Pristina, il link avra en ina nova fanestraavrir en il browser per l’armada svizra cun la Swisscoy, il 2013 e 2014. Per la dunna che lavura oz tar ina da las pli grondas interpraisas da communicaziun en Svizra, è quel temp stà da grond avantatg er per sia vita professiunala. Durant quels dus onns haja ella pudì ramassar experientscha en in mund dominà da cumonds e reglas ed er en in mund ferm masculin.
Jau hai dentant era chattà grazia mes servetsch en il Cosovo l’amur da mia vita.
Grazia la carriera militara haja ella segir er gì meglras schanzas en il martgà da lavur. Curt suenter ses return da Prisitina, ha Ladina Camenisch cumenzà il 2004 sia nova plazza, nua ch’ella lavura anc oz sco scheffa da communicaziun. Surtut uss en il temp difficil causa il coronavirus, haja ella pudì profitar da sia experientscha da savair reagir e lavurar sut grond squitsch, nua ch’ins haja simplamain da funcziunar.
Senza na vai betg
La preschientscha da la KFOR en il Cosovo dapi 21 onns è tenor la Schlarignotta, che lavura e viva entant dapi onns en la Bassa, da grond’impurtanza. Quai per impedir che la situaziun delicata explodescha puspè tranter ils Serbs ed ils Albanais dal Cosovo.
Sco en scola cun scolars che han baruffa, surprenda la KFOR la funcziun dal magister: entant che quel è en stanza, na capita betg bler.
La preschientscha militara da las differentas naziuns en tschintg champs en il Cosovo ha gidà a tegnair sut controlla la situaziun. Dentant dovria adina puspè novs sforzs davart da l’organisaziun internaziunala. Surtut cura ch’i dat midadas en la regenza dal Cosovo saja il potenzial da conflict svelt puspè fitg aut, uschia l’anteriura uffiziera da medias tar la Swisscoy.
