Durant 37 onns han Jon Moggi e sia dunna manà l’interpresa da tradiziun Jon Moggi transports e bavrondas a Sta. Maria en Val Müstair. Questa primavaira èn els vegnids pensiunads. Perquai ch’i n’era betg pussaivel da surdar lur firma a confamigliars, hajan els decis da dar quella or da maun, ad in pèrin giuven.
Igl è donn ch’il nom Moggi svanescha, ma che l’affar cuntinuescha è fitg impurtant.
Schanza da turnar en patria
Sven Hohenegger e si’amia Fadrina Tschenett han lavurà ed abità ils ultims onns en Samignun. Da turnar en patria saja adina stà in grond giavisch. Ch’els hajan uss survegnì l’occasiun da surpigliar la firma da Jon Moggi vesan els sco schanza. Quai malgrà che la Val Müstair cumbatta, sco autras vals, cun la depopulaziun.
Cler ch’igl è in ristg. Ma tgi che na ristga betg, na profita betg.
Actualmain quintan Sven Hohenegger e Fadrina Tschenett dus impiegads en lur firma. Ils giuvens èn da buna speranza da pudair schlargiar l’affar en avegnir.