Il mangiar saja ina part impurtanta en sia vita, ha ditg l’anteriur cusseglier federal Moritz Leuenberger durant in referat organisà da graubündenViva. El haja dentant scuvrì il mangiar cun gust pir en la vegliadetgna da var 30 onns, admetta l’um turitgais ch’ha 76 onns.
Jau sun creschì si en ina famiglia fitg severa che na permetteva betg giudiments sensitivs.
En las localitads da Cafè Badilatti a Zuoz ha l’advocat raquintà tge relaziun ch’el haja oz cun il nutriment e co ch’el è silsuenter perfin daventà sagiader da test per Gault & Millau. El ha dentant ditg ch'el na haja betg destruì reputaziuns: «Las persunas sa dattan adina gronda fadia cun cuschinar, jau n’hai perquai mai scrit las criticas en furma negativa.»
L’um pensiunà ch’abita adina puspè er en Engiadina Bassa, ha er tradì intginas episodas davart las atgnadads en il mund politic cura ch’i va per il mangiar. Uschia aveva sia secretaria scumandà ad el gia l’emprim di en uffizi sco cusseglier federal, dad esser plainamain vegetarian. Tscherts cumpromiss haja el stuì far er a reguard il consum da mangiativas e bavrondas, ha accentuà l’anteriur regent.
«Indiscutabel è ch’il mangiar unescha ils umans e gioga perquai er ina gronda rolla per exempel tar retschaviments uffizials da regentas e regents», di l'anteriur cusseglier federal. In tratg preferì n’haja el betg. Bler pli impurtant saja la cumpagnia ch’ins haja durant il mangiar, uschè Moritz Leuenberger. Quai sajan numnadamain las ingredienzas per ina vita fortunada.