La «Chamonna Tuoi» dal Club alpin svizzer CAS resta serrada l’entir enviern che vegn per motivs da segirezza. Quai ha ordinà la vischnanca da Scuol. Raschun sajan pli gronds moviments da crappa al Piz Buin Pitschen en cumbinaziun cun la naiv che pudessan muntar in privel considerabel per la chamona e ses visitaders.
Al flanc ost dal piz èn radund in milliun meters cubic en moviment. Tenor stan actual èsi da quintar ils proxims tschintg onns cun ina crudada da grippa pli gronda. Davart il manaschi da stad decida la vischnanca l’avrigl. Lura duaja la situaziun da privel vegnir evaluada da nov.
Flanca vegn observada gia dapi onns
Moviments da crappa n’èn nagina raritad en il territori alpin – tuttina vegnan els observads pli e pli cun las temperaturas medias creschentas ed ils eveniments da la natira che s’augmentan. Durant dus onns ha in biro spezialisà elavurà en cooperaziun cun la vischnanca, cun l'Uffizi da guaud e privels da la natira sco er cun il SLF in ina valitaziun fin l’atun 2022.
Ins ha fatg plirs sgols cun helicopters e dronas, analisas da radar al lieu e calculà differents models. Cun agid da quellas datas sa lascha formular la situaziun da privel ed ina serrada preventiva da la «Chamonna Tuoi» per l’enviern.
