Suenter avair gestiunà in mez tschientaner la Chasa Chalavaina, ha Jon Fasser da Müstair vendì l’hotel ed ustaria. L’um dad 81 onns ha pia sa decis da giudair uss sia pensiun. La nova possessura è la fundaziun Chasa Chalavaina ch’è vegnida fundada il november da l’onn passà. L’intent è da collavurar stretg cun la claustra Son Gion che sa chatta gist dasper l’hotel tradiziunal cun 15 chombras.
Nizzegiar sinergias
Er per la fundaziun Pro Claustra Son Gion èsi allegraivel che la Chasa Chalavaina ha chattà ina successiun. La claustra vul numnadamain sa sviluppar en l'avegnir ad in center da cumpetenzas. Previs èn localitads per scienziads e scienziadas ed er il museum da la claustra duai vegnir engrondì ed uschia attrair dapli giasts. Las pernottaziuns per persunas externas èn lura prevesidas en l’hotel Chasa Chalavaina. La reavertura è planisada la stad da quest onn.