Ils purs eran vegnids obligads durant la Segunda Guerra mundiala da producir dapli graun per garantir la segirezza da nutriment ed uschia è vegnì construì er il mulin da Tarasp. Ils proxims 40 onns è quel lura stà en funcziun, ma a partir dal 1986 n’era l’interess betg pli avant maun e la porta dal mulin è vegnida serrada.
La societad «Pro Terra Engiadina» ha lura piglià l’iniziativa per restaurar il mulin electric. Oravant tut l’implant electric e parts dal tetg han ins stuì refar. Cun agid da la vischnanca e da fundaziuns han ins chattà las finanzas e pudì restaurar l’indriz.
Il mulin da Tarasp duess star a disposiziun a scolas ed al turissem, qua è planisà da preschentar il viadi dal graun al paun. Plinavant vul la societad er tschertgar ina collavuraziun cun ils pasterners indigens per realisar plirs products indigens.
