Gist plirs motivs han chaschunà ina crisa. La musica giuvenila Valsot ha stuì serrar ses manaschi l’onn 2019 causa mancanza dad in dirigent. Gist suenter ha cumenzà la crisa da corona e cun quella han bleras musicantas e musicants bandunà las societads.
Questa situaziun n'han las musicas betg laschà valair. Musicantas e musicants da las duas musicas han elavurà in project.
Collavuraziun cun la scola da Valsot
Las musicas han envidà las classas da scola ad in di da portas avertas. Ensemen cun la magistraglia han ils uffants gì la pussaivladad dad empruvar a sunar in instrument e pitgar sin la battaria. Tenor Jachen Kienz, in dals iniziants, ha quella acziun gì success.
Il project prevesa ina collavuraziun stretga cun la scola da musica Engiadina Bassa Val Müstair che surpiglia la scolaziun dals uffants.
Animar anteriuras musicantas e musicants
Creschids senza experientscha, musicantas e musicants ch'han sunà avant onns in instrument duessan survegnir la pussaivladad dad emprender tras las scola da musica u era cun agid dals dirigents.
Quest project e vegnì inoltrà tar l’Uniun chantunala da musica. Las duas musicas Ramosch e Tschlin speran ch’els vegnan sustegnids finanzialmain. La decisiun da vart dal chantun è anc pendenta.