Na ad engrondiment da l'hotel San Gian a San Murezzan

Votantas e votants han ditg na a la revisiun parziala da la planisaziun locala San Gian – in grev culp per l'hotel a San Murezzan.

vista sin il hotel San Gian Bild in Lightbox öffnen.

Legenda da maletgs: L'hotel San Gian a San Murezzan. © 2016 hotelleriesuisse

In «na» hai dà per la revisiun parziala da la planisaziun locala San Gian. La revisiun avess dà la pussaivladad d'engrondir l'hotel San Gian. Lez avess survegnì trais auzadas en pli e fiss stà a la fin uschè aut sco l'hotel Reine Victoria ch'è posiziunà sper il San Gian. Era il plaunterren avess il San Gian vulì fabritgar ora.

La populaziun da San Murezzan ha ditg «na» cun 472 cunter 443 vuschs. Delicat è ch' il «na» vul era dir che il possessur da l'hotel San Gian, Hans Jürg Buff, sto ussa puspè demontar la construcziun enturn ils balcuns da l'hotel ch'el aveva fabritgà l'onn 2011. Quella construcziun n'era betg confurma a la permissiun da construcziun. Quai avess ins ussa vulì curreger. Tge che il na vul dir per l'hotel San Gian n'è betg anc cler. Il possessur da l'hotel n'è betg stà cuntanschibel per ina posiziun.

Gea per center da trenament

In cler gea hai percunter dà per l'infrastructura mobila per il center da trenament d'autezza. Era la lescha da scola e la revisiun da la lescha per l'ovra electrica ha il suveran da San Murezzan acceptà.

RR novitads 17:00