Tuts vulessan respostas. La vischnanca da San Murezzan. Ils organisaturs dals auters eveniments cun chavals, il Concours Hippique San Murezzan ed il Concours Hippique Zuoz. I na dat dentant naginas respostas. Tant la vischnanca da San Murezzan sco era ils auters organisaturs han udì en las medias da l'annullaziun dal CSI San Murezzan. Provas da contactar la presidenta dal CSI Leta Joos n'han betg gì success.
Betg la prima giada problems finanzials
Il CSI San Murezzan n'ha dentant betg per la prima giada problems finanzials. Suenter l'emprima ediziun dal 2015 n'han ils organisaturs betg pajà tut ils quints. La vischnanca da San Murezzan ha lura dà in ultimatum per preschentar in plan co pajar ils debits ed in plan co finanziar ulteriuras ediziuns. A la fin dals quints ha lura San Murezzan tuttina dà il permis per la segunda ediziun dal CSI.
Donn, dentant ...
Las reacziuns davart la fin dal CSI da San Murezzan van tuttas en la medema direcziun: I saja donn ch'il CSI na possia betg exister vinavant, uschia in turnier saja ina buna chaussa per l'Engiadin'Ota. Quai dian tant la vischnanca da San Murezzan, sco era ils auters turniers cun chavals da l'Engiadin'Ota, il Concours Hippique da San Murezzan ed il Concours Hippique da Zuoz.
I saja dentant era cler che l'organisaziun dal CSI San Murezzan n'haja betg adina agì da maniera professiunala. Quai ha ditg la presidenta dal Concours Hippique da San Murezzan Ladina Meyer. I na saja betg stà pussaivel da collavurar cun la presidenta dal CSI Leta Joos.
Ussa spetgan tuts vinavant sin ils fatgs e sin decleraziuns da la presidenta dal CSI San Murezzan Leta Joos.
RR actualitad 11:00
