Siglir tar il cuntegn

Header

audio
Saira: la Federaziun svizra stritga il CSI a San Murezzan
Or da Actualitad dals 11.04.2018.
laschar ir. Durada: 49 Secundas.
cuntegn

Engiadina Nagin CSI pli a San Murezzan

La Federaziun svizra da sport da chavals ha stritgà il turnier internaziunal da tschintg stailas ord il chalender da turniers internaziunals.

La Federaziun svizra per sport da chavals communitgescha sin sia pagina d'internet che la suprastanza haja decidì da stritgar il CSI San Murezzan ord il chalender da turniers internaziunals FEI. Quai vul dir ch'il CSI San Murezzan perda il permis per far il turnier internaziunal da 5 stailas. Questa decisiun vala per quest onn, ma probablamain era per l'onn 2019.

Betg pajà la taxa internaziunala

Il president da la Federaziun svizra Charles Trolliet ha ditg envers RTR ch'il CSI San Murezzan n'haja betg pajà la taxa per la federaziun internaziunala FEI. I sa tractia dad ina summa da vers 30'000 francs. Ils termins giuridics sajan scadids, la federaziun svizra haja stuì reagir.

In permis per in CSI a San Murezzan l'onn 2019 fiss tenor Trolliet ord optica da la federaziun svizra pussaivel, sch'ils organisaturs da San Murezzan pajassan ordavant la taxa internaziunala. La federaziun svizra fiss cuntenta sch'i dess puspè in turnier a San Murezzan ha ditg Trolliet. Ins stoppia dentant era savair che 6 turniers da 5 stailas en Svizra sajan fitg blers. I vegnia adina ad esser grev da chattar avunda sponsurs per tut ils custs.

Sper San Murezzan datti en Svizra anc ils turniers da 5 stailas a Basilea, Son Gagl, Turitg, Genevra e Losanna. Il turnier da Losanna perda dentant sco San Murezzan era ses permis.

Ils organisaturs dal CSI San Murezzan n'èn fin ussa betg stads cuntanschibels.

RR novitads 17:00

Artitgels legids il pli savens