Siglir tar il cuntegn

Header

Navigaziun

Ladysmith Black Mambazo - 8 umens en vestids nairs cun detagls africans chantan en in mez rintg.
Legenda: Ils otg commembers da Ladysmith Black Mambazo al concert dal Festival da Jazz a San Murezzan. RTR, Riccarda Müller
cuntegn

Engiadina Nagin "Lej da Jazz" - tuttina in concert plain energia

Il concert openair dal Festival da Jazz dal 2019 è crudà en l'aua ed ha stuì vegnir spustà en la sala da concert dal Reine Victoria.

Il concert dadora è dapi onns in dals highlights dal Festival da Jazz da San Murezzan. L'onn passà ha il pianist Ludovico Einaudi attratg radund 4000 aspecaturs al Lej da Staz.

Quest'onn plievgia e temperaturas fraidas. Il concert da Ladysmith Black Mambazo è perquai vegnì spustà en la sala da concert dal Reine Victoria. Il concert ha tuttina attratg blera glieud, la sala da concert cun plazza per radund 400 persunas èra plaina.

Nua è restada la stad?

Sibongiseni Shabalala, in dals figls dal fundatur da la gruppa è stà fitg dischillus ch'il concert n'ha betg pudì avair lieu dadora. El veva s'allegrà fitg sin l'atmosfera speciala amez las muntognas engiadinaisas.

I fiss stà bel d'udir sche las muntognas portan enavos l'echo.
Autur: Sibongiseni ShabalalaCommember Ladysmith Black Mambazo

La gruppa che chanta a-capella melodias tradiziunalas da l'Africa dal Sid ha electrisà il public cun lur energia. Ins po s'imaginar fitg bain co che quai è stà avant stgars 60 onns cura che la gruppa ha gudagnà tut las concurrenzas da chant tradiziunalas en lur lieu d'origin ed è en consequenza vegnida sclausa da quellas.

Il success è vegnì cun Paul Simon

L'onn 1986 ha Ladysmith Black Mambazo producì in album cun Paul Simon da Simon&Garfunkel. L'album «Graceland» ha avert a la gruppa las portas da l'entir mund. Dapi quest success è la gruppa sin turnea e sa legra da pudair purtar lur musica e lur tradiziuns or en il mund.

RR actualitad 06:00