Questa fin d’emna è San Murezzan stà sut l’ensaina dal «San Murezzan triatlon». La sonda è vegnì organisà il Kidscup by Nicola Spirig, in triatlon per uffants. E la dumengia èn lura partids ils creschids u per in duatlon u per in triatlon.
La fin d’emna da triatlon vegn organisada dapi quatter onns da la triatleta e campiunessa olimpica Nicola Spirig e da ses um Reto Hug cun la finamira, che blers sportists e surtut ils uffants survegnan plaschair da far triatlon.
Nagin è memia giuven ni memia vegl per triatlon
Triatlon è enconuschent d'esser in sport fitg strapatschus. Reto Hug, organisatur da la fin d’emna «San Murezzan triatlon by Nicola Spirig», vul mussar cun questas cursas, che quai sport po era far plaschair e che mintga vegliadetgna è adattada per cumenzar a far triatlon.
Ils pli giuvens en il center da l’attenziun
Il Kidscup by Nicola Spirig è per uffants tranter 5 e 14 onns. Passa 180 uffants, giuvens e giuvnas èn s'annunziads per la cursa. Partids èn els en differentas categorias da la furmia enfin l’urs. Intgins èn sa participads cun grondas aspectativas, intgins simplamain per avair plaschair.
Reto Hug e sia dunna, la triatleta Nicola Spirig, èn fascinads da l'Engiadin'Ota e san precis, pertge che questa regiun è adattada per il triatlon.
Nov Mecca per triatlets
Durant ils ultims onns s'ha San Murezzan sviluppà onn per onn ad in lieu ideal per trenaments d'autezza. Grazia al bogn public Ovaverva, la pista da tartan da 400 meters e las sendas per bikes è la regiun predestinada per trenar il sport da triatlon, ha suttastritgà Reto Hug.
RR novitads 18:00