Nagin scumond pli per schurnalists a Puntraschigna

Il tema era vegnì actual suenter ch'ina schurnalista era vegnida exclusa d'ina radunanza communala la stad vargada. Sin quai ha la suprastanza communala decidì da surlavurar questa regla. Sut cundiziuns han schurnalists uss en avegnir access a las radunanzas.

microfon. Bild in Lightbox öffnen.

Legenda da maletgs: Il microfon sto restar stizzà durant radunanzas communalas a Puntraschigna, ils schurnalists pon uss però esser en sala. Keystone

Senza cuntravusch ha la populaziun da Puntraschigna acceptà la proposta da la suprastanza communala, la quala era da lubir l'access a schurnalistas e schurnalists durant radunanzas communalas.

Questa lubientscha è dentant colliada cun in pèr reglas.

Sco per exempel:

  • Mo schurnalistas e schurnalists accreditads duain pudair persequitar la radunanza.
  • La dumonda d'accreditaziun han il schurnalist u la schurnalista da far ina giada tar la chanzlia communala.
  • Igl è scumandà da filmar e far registraziuns da tun durant la radunanza.
  • Communicaziuns directas vers in ora n'èn betg lubidas.

Uschia duai il concept ademplir trais finamiras:

  • Puntraschigna vul garantir transparenza en tut ils affars da la vischnanca.
  • Davart radunanzas communalas vegn rapportà da mez da massa professiunals.
  • La discussiun da la populaziun vegn betg influenzada tras cameras e microfons che fan registraziuns.

La nova regla vala a partir dals 1 schaner 2017.

RR actualitad 11:00