Engiadina Mountains posseda la pendiculara da Lagalb si vers il pass dal Bernina. Lagalb è en funcziun dapi il 1963, n'ha tenor Engiadina Mountains dentant mai gì success finanzial. Engiadina Mountains ha perquai decis da terminar la gestiun da Lagalb la fin da quest enviern.
Nagina basa per success finanzial
Engiadina Mountains scriva en sia communicaziun, che Gian Luzi Battaglia haja fatg scleriments detagliads ed haja lura decis che las premissas economicas per surpigliar la gestiun da Lagalb na sajan betg favuraivlas. Luis Wieser, il president dal cussegl administrativ dad Engiadina Mountains di, che el chapeschia bain la decisiun da Battaglia, Lagalb n'haja anc mai gì ina gestiun rentabla.
Engiadina Mountains è anc adina avert per novs discurs. Actualmain sajan ins vid novs discurs cun ina gruppa d'interessents engiadinaisa. Quels na veglian dentant anc betg sa preschentar en la publicitad.
Era la vischnanca da Poscvhiavo è dischillusa ch'i n'ha betg funcziunà cun l'investur Battaglia. Il president communal Alessandro Della Vedova spera dentant anc adina ch'ins chattia investurs. La vischnanca da Poschiavo fiss tenor Della Vedova pronta da sez era investir, sch'i dess ina soluziun a lunga vista.
RR novitads 12:00