La populaziun da la Val Müstair ha decidì cler e net cun 515 gea encunter 104 na: la suprastanza communala vegn elegida en avegnir sur tut la Val Müstair. Quai vul dir ch’i na dat betg pli elecziuns en las singulas fracziuns. Dapi la fusiun da la vischnanca l’onn 2009 era il sistem uschia che mintga fracziun ha pudì eleger in dumber defini da suprastantas communalas. En avegnir na dependi damai betg pli quantas persunas da la suprastanza che derivan da tgenina fracziun. Il president communal Arno Lamprecht è fitg cuntent cun il resultat fitg cler. Uschia po la Val Müstair eleger tenor il nov sistem sia suprastanza communala l’emprima giada quest atun. En in prim scrutin vegn elegì il president communal, suenter segua en in segund scrutin l’elecziun dals suprastants communals.
Elecziun duai esser valaivla
Avant la votaziun avevi anc dà dubis davart da l’uffizi chantunal da vischnancas schebain ina vischnanca fusiunada possia midar gia paucs onns suenter ina fusiun puncts impurtants da la constituziun communala. Quai surtut en connex cun las votaziuns en Val Lumnezia. Arno Lamprecht è dentant persvadì che la regenza vegn ad acceptar la votaziun clera en Val Müstair per midar il sistem electoral per la suprastanza communala. Quai era pervia che la fusiun en Val müstair è gia en vigur dapi 7 onns.
