Las davosas tschintg fin d’emnas cun trid’aura han gì consequenzas negativas per las chamonas dal CAS en Grischun. Sco ch’il responsabel per la chamona dal CAS Bernina, Jachen Müller ha confermà ad RTR, avess la stagiun da stad en sasez cumenzà fitg bain ed empermess bunas cifras. Dentant haja la naiv dal settember ruinà tut.
Grondas perditas
Per la Chamona Linard en Engiadina Bassa signifitga quai radund in terz damain entradas en cumparaziun cun auters onns. La Chamona Tschierva ch'è il lieu da partenza per las grondas turas aut-alpinas sin il Bianco u il Piz Roseg, ha registrà durant il mais da settember be 80 pernottaziuns empè da 800 sco auters onns.
L’aura e las previsiuns sin ils telefonins
Il trend negativ suenter la naiv dal settember è represchentativ per tut las chamonas en Grischun. Il motiv principal è tenor las guardias-chamona en emprima lingia l’aura. L’avust ed il settember sajan fitg impurtants mais per la stagiun ch'è gia fitg curta cun be quatter mais. Gist en quels dus mais era l’aura nauscha cun plievgia e naiv, ha declerà Müller. Ultra da quai reageschan ils viandants ed alpinists bler pli spert sin previsiuns da l’aura. Empè da guardar or da fanestra, vegnia pli gugent consultà pliras applicaziuns sin il telefonin.
-
Bild 1 von 13. Las plazzas dador la Chamona Tschierva èn libras. Bildquelle: RTR, Anna Caprez.
-
Bild 2 von 13. La Chamona Tschierva cuntansch ins davent da la Val Roseg. Bildquelle: RTR, Anna Caprez.
-
Bild 3 von 13. La chamona Tschierva. Bildquelle: RTR, Anna Caprez.
-
Bild 4 von 13. Era sche l'aura fiss bella per turas alpinas, impedescha la naiv sin ils auts ellas. Bildquelle: RTR, Anna Caprez.
-
Bild 5 von 13. La vista da la chamona Tschierva. Bildquelle: RTR, Anna Caprez.
-
Bild 6 von 13. Blers viandants n'han betg pusà lur bulschas vi dil mir da la Chamonna Tschierva ils ultims dis. Bildquelle: RTR, Anna Caprez.
-
Bild 7 von 13. Tut fiss pront per tschentar giu e giudair il panorama. Bildquelle: RTR, Anna Caprez.
-
Bild 8 von 13. La naiv frestga impedescha ch'ins pudess ir actualmain per exempel sin il Spitg dal Bianco. Bildquelle: RTR, Anna Caprez.
-
Bild 9 von 13. Caroline Zimmermann ha da memia mangiativas en tschaler. Bildquelle: RTR, Anna Caprez.
-
Bild 10 von 13. La mustgera da la Chamona Tschierva fiss anc detg plaina. Bildquelle: RTR, Anna Caprez.
-
Bild 11 von 13. La Chamona Tschierva porscha radund 100 plazzas per durmir. Bildquelle: RTR, Anna Caprez.
-
Bild 12 von 13. Ils letgs en la Chamona Tschierva èn savens restads vids las ultimas emnas. Bildquelle: RTR, Anna Caprez.
-
Bild 13 von 13. Ils letgs da la chamona Tschierva. Bildquelle: RTR, Anna Caprez.
Accidents e la bova
Causa la naiv èn pliras turas sin ils auts impussiblas u fitg privlusas. Per exempel n’haja pli nagin fatg il Spitg dal Bianco dapli trais emnas, uschè Caroline Zimmermann, la guardiachamona da la Chamona Tschierva. Quai pervi da la blera naiv. Ma era ils quatter accidents mortals da questa stad en la regiun dal Bernina sajan per part la culpa che damain alpinists èn arrivads sin la muntogna per pernottar e betg dad emblidar è l’effect che las bovas a Bondo han gì ed influenzà ils plans dals giasts potenzials.
RR actualitad 12:00