Siglir tar il cuntegn
cuntegn

Engiadina Naiv loma als campiunadis svizzers da passlung

En Val Müstair èn questa fin d'emna ils campiunadis svizzers da passlung. Sin la pista ch'ins ha duvrà per las cursas dal Tour de ski. Ussa èsi dentant magari chaud e perquai èn las pistas lomas.

pista a Tschierv
Legenda: Pistas lomas – relaziuns difficilas per ils atlets. RTR/David Spinnler

Durant trais dis èn en Val Müstair las cursas dals campiunadis svizzers da passlung. Ils organisaturs da las cursas da Tour de ski han era anc organisà las concurrenzas naziunalas. Uschia pon ins profitar da l'infrastructura, surtut da la naiv artificiala ch'ins ha producì.

Grazia a la naiv artificiala èsi ussa insumma pussaivel da far cursas da passlung. Las temperaturas èn numnadamain uschè autas che las parts dal traject cun naiv natirala ch'ins vuleva duvrar per la cursa da 50 kilometers èn luadas.

La cursa da 50 kilometers è perquai sin il traject da 2,5 kilometers ch'ins aveva preparà er per las cursas sin distanza dal Tour de ski. Sche la cursa po propi ir sur 50 kilometers n'è anc betg cler.

RR actualitad 12:00