Il campiunadi svizzer da snowboard ha gì lieu en la regiun da skis Motta Naluns ils 12 e 13 da mars, quai sut il patrunadi dal club da snowboard Umblanas. L’organisaziun da l’eveniment, ch'è entant daventà d’interess er per ils gronds stars dal sport da snowboard, han ils Engiadinais surpiglià a curta vista da Flumserberg.
3 da 4 campiuns olimpics ed in entir set da medaglias da Sotchi 2014 èn a la partenza a Scuol.
Cracs da snowboard en l'Engiadina
Cunquai ch’i na dat betg in’autra cursa la fin d’emna, quinta la cursa er tar la cuppa mundiala da snowboard. Perquai èn er preschents numerus sportists renumnads che vulan ramassar puncts al campiunadi svizzer en l'Engiadina Bassa.
Gia annunziada è la participaziun dal russ Vick Wild, il victur da la medaglia d’aur als gieus olimpics a Sotchi, l’indigen Nevin Galmarini, ch’aveva gudagnà la medaglia d’argient en Russia u er Patrizia Kummer, victura d'aur olimpic en la disciplina da slalom gigant.
Fin uss sajan annunziads passa 60 sportists, fatg quint avev’ins cun var 50, ha declerà la presidenta dal comité d’organisaziun Martina Hänzi envers RTR.
