Siglir tar il cuntegn

Header

cuntegn

Engiadina Nina Padrun: «Jau hai fatg novas amicizias grazia a l’emissiun»

Nina Padrun da Lavin è ina da las 7 candidatas che han cuschinà per puncts en la concurrenza «Landfrauenküche» da SRF. L’emissiun en la quala la pura engiadinaisa è l'ospitanta, vegn emessa il venderdi saira (04-11-16).

Per la mamma da dus uffants, che maina ensemen cun ses um ina puraria a Lavin, è la participaziun a l’emissiun stada ina fitg bell’experientscha. Ch’ins haja pudì far amicizia cun tut las 6 puras.

Occasiun da vegnir davent da chasa

Giudì haja Nina Padrun er da pudair ir a vesair autras regiuns en Svizra durant la filmada da las singulas emissiuns en 7 differentas regiuns.

Incredibel quant ch’i vul per ch’in maletg è finalmain pront per emetter en la televisiun.
Autur: Nina Padrun mamma e pura da Lavin

Preparà 7 empè da 6 plats

Per pudair filmar pli ditg ed or da differentas perspectivas ils plats cun las buntads regiunalas, hajan las puras gì da preparar adina in plat en pli, per ch’il team da la televisiun possia filmar quel intensivamain, ha tradì Nina Padrun.

audio
Mezdi: Landfrauenküche: Nina Padrun da Lavin
ord Actualitad dals 04.11.2016.
laschar ir. Durada: 2 minutas 55 Secundas.

Puncts ed agitaziuns

La pura engiadinaisa ha preparà charn da selvaschina per sia concurrenza. Charn da chavriel che la chatschadra ha sajettà sez il settember. Ed er betg mancar na po sco desert ina turta che la cuschinunza passiunada ha creà spezialmain per l’emissiun. Dapi la filmada èn passadas in pèr emnas, uss che la seria vegn emessa en televisiun creschia la tensiun puspè. Nina Padrun n’ha nagin’idea nua ch’ella stat cun sia prestaziun. Ella sez giavischass che la candidata bernaisa gudagnass la concurrenza.

Public viewing a Lavin

Co ch’il product final vesa ora e quants puncts che las 6 autras candidatas han dà al menu da Nina Padrun, vegn ins pir a savair en il grond final la sonda saira sin SRF 1. Per l’emissiun cun Nina Padrun sco ospitanta han collegas organisà en l’Hotel Crusch Alba a Lavin in lieu per giudair en cumpagnia la setavla part da «Landfrauenküche».

RR actualitad 12:00

Artitgels legids il pli savens