Tenor il manader dal project, Othmar Lässer, sajan ins actualmain vi d'instradar tut ils pass necessaris per realisar il nov center per vegliadetgna e sanadad en l'Engiadin’Ota. Il concept cuntegnia er ina partiziun da geriatria che duai esser realisada sin il quart plaun da l’Ospital a Samedan, fin la fin dal 2019. Quai correspunda er a la lezia che la SGO ha survegnì dal chantun.
Pre-Rehabilitaziun
La purschida sa drizza surtut a persunas pli attempadas che dovran suenter il temp acut a l’ospital anc tgira ed accumpagnament fin ch’ellas vegnan puspè da turnar a chasa. Cun involver ils differents partenaris, pon ins uschia era porscher la tgira e cussegliaziun individuala dals pazients durant ina fasa da pre-rehabilitaziun.
Gronda schanza
Ina da las grondas sfidas vegnia ad esser la tschertga d’in geriater, ha admess il manader dal project. Cun la nova purschida sper'ins er ch’il Ospital regiunal d’Engiadin’Ota daventia pli attractiv per glieud che lavura en la partiziun da tgira. Sche tut va tenor plan, fa la gruppa da lavur enturn Othmar Lässer quint cun in permiss definitiv dal chantun, per manar la nova partiziun, la primavaira dal 2020.
RR actualitad 06:00