Siglir tar il cuntegn

Header

cuntegn

Engiadina Nov sistem da segirezza per maschinas da pista a San Murezzan

Il nov concept è vegnì sviluppà da la «Seeinfra» ch'è responsabla per l’infrastructura sin il lai da San Murezzan ensemen cun ina firma da la bassa. Divers tests èn vegnids fatgs, diversas variantas evaluadas. Uss è il resultat final en producziun.

Tenor Christian Brantschen, CEO da la «Seeinfra» avess il sistem da funcziunar e porscher ina segirtad absoluta per ils lavurants cun las maschinas da pista sin il lai schelà. 2 maschinas da pista vegnan ad esser equipadas cun ina sort cussins d’aria. Quels vegnan montads enturn la maschina. Ils custs da radund 850’000 enfin 900’000 francs surpiglia la vischnanca.

Sistem è pront per quest ‘enviern

En paucas emnas vegnan ils cussins ad esser montads per l’emprima giada vi d’ina maschina. Lura han lieu tests, di Brantschen. Sche tut va bain, lura èn las maschinas cun il nov sistem en funcziun quest ‘enviern.

Mintga vischnanca sto guardar sezza

Quai vala lura mo per San Murezzan. Mintga vischnanca elavura in agen concept. Lasuenter èn collavuraziuns pussaivlas, in barat ni dar a tschains ina ni l’autra maschina che in’autra vischnanca avess gist da basegn. Per Silvaplauna, Segl e Malögia vala entant vinavant la directiva ch'ins po mo ir sin ils lais cun ils «nudaders». Quels ch’ins conuscha da fin qua.

Actualitad la saira 17:00

Artitgels legids il pli savens