Durant ina dieta il matg 2017, duai la nova suprastanza communala da Bever concretisar las finamiras e definir en tgenina direcziun che la vischnanca duai s'orientar en l'avegnir. Bler n'ha il president anc betg vulì tradir, da midar haja dentant insatge.
Engaschament da passa 100 %
Fadri Guidon aveva gudagna surprendentamain il cumbat electoral a Bever encunter Ladina Meyer cun 209 a 78 vuschs. Il squitsch e las aspectativas davart da la populaziun da Bever sajan bain stads gronds al cumenzament da ses uffizi. Dentant haja el tuttina pudì cumenzar en tutta calma la lavur d’in president communal. Entant haja quai sa midà. Actualmain ha il magister er da dumagnar in pensun da 80% en scola e bun 30% en la vischnanca da Bever.
Duas grondas sfidas
Surtut tut las lezias regiunalas che las vischnancas d’Engiadin’Ota han da reglar fin la fin da quest onn, sajan numerusas e per part er cumplitgadas. Per Fadri Guidon per gronda part ina materia cumplettamain nova, uschia che l'um da 48 onns ha gì da sa leger en per esser sin il medem livel sco ses collegas en uffizi.
RR actualitad 07:00