Sco ch’il pledader da Denner, Thomas Kaderli ha declerà ad RTR, n’haja la decisiun da realisar sper San Murezzan in’ulteriura butia en Engiadin’Ota da far nagut cun la Migros che prevesa d’avrir sia emprima butia en Engiadina il 2021 a Samedan.
Opziun anteriuras localitads Vögele
Nua a Samedan ch’il nov Denner vegn ad esser da chasa, n’ha Kaderli anc betg vulì tradir. Las localitads visavi il plazzal da construcziun da la Migros a Samedan, en l’anteriura Chesa Badraun, èn dentant dapi in pèr mais vidas. Uschia ch’igl è bain pussaivel ch’il lieu da la nova butia vegn ad esser là. Il pledader da Denner n’ha betg vulì confermar, dentant era betg dementir questa speculaziun.
Cumplettaziun vicendaivla
Cler è per Kaderli dentant, che las duas interpresas sa cumpletteschan vicendaivlamain cun lur differents sortiments. Samedan daventass cun quai in center anc pli diversifitgà per ir a cumprar en – cun Coop, Aldi ed en avegnir Denner e Migros. Che la turta pudess esser memia pitschna per tuts, na craja Thomas Kaderli betg, dentant vegnia a sa midar la repartiziun da quella.
Sin la filiala existenta da Denner a San Murezzan, n’haja la nov'avertura nagina influenza. Quella restia er en avegnir, uschia Thomas Kaderli.
RR novitads 17:00