Per ina da las trais sutgeras sur Zuoz vegn a finir suenter 20 onns la concessiun da manaschi. La sutgera «Pizzet» na duai betg vegnir sanada, ma remplazzada cun ina nova sutgera. La possessura «Sutgeras e runals Zuoz SA» – curt SSZ SA – n’ha però betg ils meds finanzials per finanziar il project da 10 milliuns francs.
La gestiun porta sasezza. Però nus na pudain betg far grondas investiziuns cun questa svieuta che nus avain.
Vischnanca gida da finanziar
L'acziunaria principala da la SSZ SA è per il mument cun bundant 47% da las aczias la vischnanca da Zuoz. Tenor il plan da la SSZ SA vulan ins auzar il chapital d’aczias cun l'import da 10 milliuns francs per pudair finanziar la nova sutgera «Pizzet». La vischnanca da Zuoz fiss previsa era vinavant dad esser l'acziunaria principala cun almain 51% da las aczias.
La radunanza communala ha ils 25-06-2025 approvà la il credit transitoric da 10 milliuns francs per che la planisaziun da la nova sutgera «Pizzet» possia cumenzar. La fin da l’onn duain lura vegnir signadas las novas aczias.
La speranza sin il rest dals acziunaris
Sch'ils 10 milliuns da la vischnanca da Zuoz vegnian lura propi duvrads cumplettamain per la construcziun da la nova sutgera, n’è betg anc cler. Per il president communal sco era il mainagestiun saja l'investiziun da la vischnanca en il meglier cas 5,1 milliuns francs per 51% da las aczias. En il pli nausch cas duai la vischnanca surpigliar 100% da las aczias cun ina valita da 10 milliuns francs. Quai dependa però era dals auters acziunaris e sche quels èn pronts da cumprar ina part da las aczias novas.
Debits vegls en ils cudeschs vegnan scrits giu
En ina segunda dumonda da la SSZ SA han ils votants e las votantas decis, che la firma po scriver giu debits da 11,5 milliuns francs envers la vischnanca Zuoz. Quella ha gia scrit giu ils debits en ses cudeschs. La decisiun è crudada cleramain cun 110 Gea cunter 22 Na tar trais abstenziuns.