Nua èn ils giuvenils en Engiadina?

Unir giuvenils da l’Engiadina, la Bregaglia, la Val Poschiavo e la Val Müstair, quai fiss stada la mira dal chor da giuvenils 11/17. L’uniun da chant Engiadina ha lantschà il project. Annunzias han els però gì memia paucas, be diesch.

In chor da giuvenils Bild in Lightbox öffnen.

Legenda da maletgs: «Nua èn ils giuvenils?» Chors da giuvenils vegnan adina pli rars. Reuters

In dals motivs per las paucas annunzias è segir il viadi, di Barbara Camichel. Ella è ina da las organisaturas dal project da chant. Be paucs èn pronts da far in viadi relativ lung be per ina prova da chor. Plinavant fissan tut las provas la sonda u la dumengia. Surtut giuvenils che fan in emprendissadi vulan nizzegiar quels dis auter. Ils blers dad els perdan suenter la scola obligatorica il contact cun il chant.

Surtut scolars dal gimnasi

Tut ils 10 giuvenils ch'eran s'annunziads per il chor èn scolars d'ina scola media. Là han els dapli contact cun musica e cun chors. La motivaziun dad ir en in auter chor saja uschia pli gronda. Era ils chors da giuvenils enconuschents en Grischun, l'Ensemble vocal incantanti ed il Chor da giuvenils Grischun, chattan la plipart da lur chantadurs en ils gimnasis.

In problem chantunal

En tut il chantun han il chors memia paucs chantadurs. Surtut giuvenils èn stgars. L'Uniun da chant chantunala studegia dapi ditg, co motivar ils giuvens e las giuvnas da chantar. Ina metoda fiss, da sustegnair dapli ils chors d'uffants. La speranza è, ch'els chantan uschè gugent, ch'els vulan era pli tard chantar vinavant.

RR actualitad 08:00