Durant 3 dis vegn discutà, trattà e natiralmain era guidì l’inscunter dals guardiachamonas svizzers. Radund 100 fan part, tenor l’organisatura dal inscunter 2021 Ursula Hofer, che maina la chamona Lischana sur Scuol e quai saja ina fitg gronda participaziun. L’onn passà hajan ins stuì desister dal inscunter causa corona.
Da discutar dettia bler, ma cumenzar cumenza tut cun in curs davart cas urgents medicinals. Durant in di emprendan els sco reagir a temp ed en il medem mument era quietar ils ulteriurs giasts da las chamonas.
Ils gronds temas:
Il contract da fittanza
In gruppas da lavur vegn a discutar sur dal contract da fittanza general tranter guardiachamonas e possessurs da las chamonas. Il contract actual è bunamain 10 onns vegls, quel saja betg pli sin il stan actual. L’organisaziun da guardiachamonas Svizra vul suttametter in contract da fittanza adattà al temp d’ozendi.
Il contract collectiv da lavur
Tegnair en 8 uras da lavur al di saja quasi impussibel en chamonas, adina puspè stoppian ins chattar soluziuns pragmaticas, ma quellas n'èn betg definidas e na correspundian per part betg a la lescha da lavur actuala. Quest tema central vul l’organisaziun da guardiachamonas Svizra ussa discutar a fund e chattar schliaziuns per il avegnir.