Entant na datti anc nagins cas da coronavirus en l'ospital a Scuol. Ma davos las culissas vegnan preparads tut ils scenaris pussaivels.
Scenari 1: Blers pazients intensivs
En quest cas vegn tenor il directur e schefmedi Joachim Koppenberg midà dad in ospital regular sin in ospital d’urgenza. Operaziuns betg acutas vegnan spustadas. Il persunal vegn a sa concentrar sin la nova situaziun causa il coronavirus.
L’ospital Scuol ha lieu – era sut normalas circumstanzas – per isolar tschintg enfin sis persunas, en cas d'urgenza era enfin quindesch persunas. Plazs per persunas che ston però avair sustegn da respirar datti mo ina. Tals pazients vegnissan lura tramess enavant en auters ospitals che han dapli capacitads.
Scenari 2: Il persunal croda ora
Il problem è il persunal da tgira: Radund 140 persunas vegnan mintgadi da l’italia e l’Austria a Scuol a lavurar. Quai èn radund 50% dal persunal che lavura en differentas partiziuns da la tgira.
Avess il cunfin da vegnir serrà, u avess era il persunal sez da vegnir pertutgà dal coronavirus, lura vegnissan clamadas persunas da la protecziun civila u dal militar. Quels surpigliassan la tgira da pazients stabels, per ch'il persunal qualifitgà pudess lura sa concentrar sin ils cas pli grevs.
L’ospital Scuol funcziuna actualmain tut normal, nagins cas cun in'infecziun da corona. Ils responsabels èn però en stretga collavuraziun cun las instanzas regiunalas e chantunalas per alura trair las gistas mesiras, il mument che quai fa lura da basegn.