Cun inaugurar la staziun privata sin la 6avla auzada da l’Ospital regiunal d’Engiadin’Ota è finida in’emprima etappa da la planisaziun dal plan da master «Il Futur 2020». L’avertura da la 5avla auzada cun ina partiziun generala è gia stada il december passà e quella è uschia er gia occupada.
Bunamain in hotel
La nova partiziun cun la staziun privata sin il 6avel plaun è cuntanschibla er directamain via ascensur. Ella sa preschenta suenter lavurs che han durà 8 mais, pli clera ch’avant ed è dominada da tuns da terra, cun ornaments che sumeglian als tipics sgrafits engiadinais ils giasts.
Nus vulain stgaffir in’atmosfera d’oasa da bainstar ed uschia er sustegnair l’effect da guariziun.
La purschida dal segund grond ospital dal chantun Grischun duai restar la medema. Dentant duai la partiziun privata sa differenziar cleramain da quella generala. Quai er per distinguer pli cler tranter pazients ch’èn segirads privat e quels che han ina assicuranza per la partiziun generala. Cun la spierta sin il 6avel plaun veglia l’ospital a Samedan perfin sumegliar ad ina gestiun d’in hotel, uschia Beat Moll, il CEO da la SGO.
Sfida logistica
Tut las lavurs da sanaziun e renovaziun èn vegnidas fatgas durant che l’ospital era avert. La finamira principala saja perquai stada da resguardar en emprima lingia ils basegns dals pazients e da lavurar tenor ina buna planisaziun. Ultra da quai haja la pandemia da corona influenzà tut las lavurs e termins.
Cun il sistem actual cuntegnan las tariffas da l’ospital er ina part per finanziar las investiziuns dals proxims onns. L'etappa actuala cun la sanaziun dal 5 e 6avel plaun ha custà 6 fin 7 milliuns francs. Per realisar tut ils plans, han ils meds da vegnir finanziads tras entradas currentas. Ina finanziaziun tras il maun public n’è betg prevesida.
Il plan da master «Il Futur 2020» duai esser a fin il 2024. La realisaziun da las proximas etappas ha gia cumenzà. Suenter Pasca vegn fabritgà enturn il plaunterren.
