Las vischnancas da l’Engiadin’Ota han da decider en las radunanzas communalas dals 4 da november u a l’urna ils 14 da december davart la nova cunvegna da prestaziun cun la Fundaziun provediment da sanadad d’Engiadin’Ota – curt SGO.
En la missiva per la radunanza communala da Samedan recumonda la suprastanza in Na a la cunvegna. Las consequenzas finanzialas che la nova cunvegna da prestaziun avess per la vischnanca na sajan betg da giustifitgar, ha ditg il president communal Gian Peter Niggli.
Il motiv principal è finanzial. Samedan e forsa er autras vischnancas na pon betg sa prestar uschè autas summas, e quai be per dus onns.
Ultra da quai na dettia era betg mesiras per reducir il deficit da gestiun da l’ospital. Ina strategia per il temp suenter il 2027 na dettia era betg, quai l’argumentaziun da la suprastanza da Samedan.
La medema tenuta ha er il cussegl communal da Zuoz. La chargia finanziala per la vischnanca fiss memia gronda. Da conceder a la SGO garanzias da deficit e liquiditad senza limits d’imports e mantegnair immobiglias na saja betg giustifitgabel envers la populaziun, di il president communal Romeo Cusini.
Suenter investiziuns da sur 40 milliuns francs en l'ospital a Samedan èsi grev da declerar a la populaziun pertge ch'ins avess d'investir ils proxims dus onns anc ina giada 10 milliuns.
Punct da partenza per las ponderaziuns da recumandar in Na saja a Zuoz stà ch’il represchentant da la vischnanca en il cussegl da fundaziun da la SGO è sa retratg per immediat.
Nagina transparenza
Crititgà vegn er da tuts dus gremis ch’ins n’haja betg fatg ina discussiun da basa davart la purschida da prestaziun da l’ospital regiunal a Samedan. I manchia er la transparenza areguard ils custs per in provediment da sanadad da basa e las prestaziuns accessoricas.