La cunvegna da prestaziun actuala scada la fin dal 2025. Perquai ha la Fundaziun per il provediment da sanadad Engiadin'Ota (SGO) preschentà ina nova cunvegna limitada per ils onns 2026/2027 – cun ina finanziaziun transitorica da 50,8 milliuns francs.
Radund 300 abitantas ed abitants han persequità las infurmaziuns da las responsablas Selina Nicolay (presidenta) e Nora Saratz-Cazin (vicepresidenta) da la fundaziun dal provediment da sanadad Engiadin'Ota, curt SGO. L'infurmaziun publica a Puntraschigna è stada l'unica per las abitantas ed abitants da l'Engiadin'Ota. Ussa vegnan las vischnancas ad infurmar e decider.
Ina maioritad da quellas persunas che RTR ha dumandà sch'ellas hajan gia fatg in'opiniun han respundì ch'ellas prevesian da dir Gea ad ina prolungaziun limitada da dus onns a la cunvegna da prestaziun.
Motivs da la vart che votescha Gea
Ils motivs menziunads èn l'intschertezza suenter ina procedura da concurs, la tema da betg avair pli pled e chapitel sche tut vegn administrà d'in procuratur independent. Finalmain na vulan blers betg periclitar la purschida actuala da l'ospital.
Mancanza da strategia per l'avegnir
Ma i dat era divers che vesan ina schanza cun dir Na. Ils responsabels da la SGO n'han betg preschentà ina clera strategia co refurmar l'ospital entaifer ils dus onns nua che las vischnancas pajassan ils 50,8 milliuns.
I na dastga betg esser uschè che suenter dus onns procura l'ospital enavant gronds deficits.
Sche betg tut las 11 vischnancas approvan questa cunvegna a las votaziuns dals 4 da november, respectivamain als 14 da december, alura fiss la fundaziun insolventa entaifer curt temp, ha la SGO infurmà en ina conferenza da medias a Puntraschigna. Il cussegl da fundaziun stuess dumandar in moratori u in concurs – cun consequenzas severas per l'ospital ed il provediment da la sanadad en la regiun.
Senza la nova cunvegna e la finanziaziun transitorica ch'è colliada cun quella, fiss la SGO insolventa entaifer curt temp.
La Fundaziun per il provediment da sanadad Engiadin'Ota ha elavurà in plan da sanaziun cumplessiv per garantir tuttina il provediment medicinal da basa.
Ils detagls dal «plan B»
Il plan da sanaziun prevesa:
- da serrar l'ospital durant in moratori,
- la Clinica Gut SA surpiglias singulas prestaziuns cun il sustegn da l'ospital chantunal dal Grischun (KSGR),
- la cuntinuaziun da tschertas partiziuns – per exempel da l'assistenza da naschientscha – duvrass ina nova cunvegna,
- transferir centers per persunas attempadas, spitex e posts da cussegliaziun en novas structuras da manaschi, quai vegniss decis en ina votaziun en l'emprim quartal 2026
- vender la participaziun al servetsch da salvament da l'Engiadin'Ota a la Clinica Gut u ad in'autra interpresa
- e transferir las chasas d'ospital e dal persunal en la massa da concurs.
Models da provediment pussaivels
Clinica Gut e KSGR examineschan models alternativs: per exempel da concentrar il provediment staziunar ed in cas d'urgenza da 24/7 en in lieu ed in center ambulant cun permanence en in segund lieu. La finamira è da mantegnair il provediment da basa er en cas da crisa.