La situaziun n'è betg ord controlla, ma er a curta vista tschertga l’Ospital Engiadin’Ota ed oravant tut la chasa d’attempads e da tgira Promulins persunal per surmuntar la situaziun actuala.
Tenor infurmaziuns dal CEO Beat Moll datti adina puspè situaziuns, nua ch'il persunal croda or causa ch’in u ina d'els è s'infectà cun il coronavirus u sto restar en quarantina perquai ch'el u ella ha gì contact cun ina persuna infectada. Per betg vegnir en las stretgas vul l'ospital uss procurar per avunda persunal. Perquai han ils responsabels appellà a tut las persunas che han gia lavurà en professiuns da sanadad da s’annunziar tar els.
A curta ed a lunga vista
Tenor il CEO Beat Moll datti differentas cundiziuns da lavurar. Els tschertgan persunal per engaschaments durabels, ma er per curts engaschaments. Tschertgadas èn persunas qualifitgadas en il sectur da sanadad, ma er persunas che accumpognan ils abitants da la chasa d’attempads u gidan per exempel a servir e stattan a disposiziun sin dumonda.