Siglir tar il cuntegn

Ova Spin a Zernez La perla da las fortezzas en Grischun

Amez il guaud ad Ova Spin, sin il pass dal Fuorn, sa chatta in relict da la segunda guerra mundiala. Camuflada sco miraglia dal temp medieval, sa zuppa davos quella ina fortezza militara. La fortezza Ova Spin è per l’expert, Hans Stäbler, la perla da las fortezzas Grischunas:

En in territori dad 800 meters sa chattan sper questa fortezza var 30 indrizs militars. Quai è unic.
Autur: Hans Stäbler expert da fortezzas

Impressiuns da la fortezza Ova Spin

Defaisa cunter attatgas da las truppas da Mussolini

En la fortezza Ova Spin eran 24 schuldads. Ella saja stada impurtanta per defender la patria d'eventualas attatgas da las truppas da Mussolini si dal Vnuost. Cun ils indrizs haja la via sur il pass dal Fuorn pudì vegnir bloccada bain, uschè Hans Stäbler.

Regurdanza al temp passà

Oz è il bunker en possess da la vischnanca da Zernez. La fundaziun Pro Castellis è responsabla per il mantegniment ed ha pussibilità ch’ella è accessibla al public. Quai saja impurtant tenor Hans Stäbler. Senz'ella na possian ins numnadamain betg mussar la situaziun da lez temp uschè realisticamain.

RTR actualitad 17:00

Artitgels legids il pli savens