L'avertura era ordiundamain termindada per l’onn 2018. Problems geologics, problems da segirezza causa crudada da crappa e naiv al pe da la immensa chavorgia da radund 600 meters e finalmain era la midada da la firma da construcziun durant il temp da construcziun han chaschunà il retard sco er in augment da custs da radund 140 milliuns euros.
Ils davos dus onns han ins puspè pudì lavurar en ruaus. Sche tut funcziuna ussa sco planisà è l’avertura previsa per la fin da l'onn 2022.
Tar l’ovra electrica tranter la Svizra e l’Austria sa tracti d’in project cuminaivel tranter las Ovras electricas d’Engiadina OEE e las Ovras electricas dal Tirol TIWAG. Il project vegn a custar radund 600 milliuns euros e producescha forza per radund 100’000 chasadas. Igl è la pli gronda ovra idraulica da flum en il territori da las Alps.